「立秋」至今已經兩個多月，連月來香港天氣持續炎熱，近日終於有轉涼入秋跡象，告別炎熱夏季。不過，踏入秋天，隨著天氣轉變，身體亦會出現轉變。今集《星級大搜查》便來搜查明星們「入秋的煩惱」，以及他們如何應對。
謝安琪手部乾燥問題嚴重
《星級大搜查》訪問了多位男、女藝人，分享他們入秋後的煩惱。「樂壇天后」謝安琪作為兩孩之母，自然要肩負家庭主婦的工作，但每年入秋時段，她都面對同一個煩惱。謝安琪說：「每年夏天轉秋天我好快會感覺到乾燥，因為其實我真係一個家庭主婦嚟，咁我會做家務，即係隻手成日都會洗好多嘢。」謝安琪天舉起雙手說：「所以我有證據，我啲手指，一到秋冬就會好乾，開始會好多因為乾燥出嘅倒刺，一到秋天佢就出嚟，有時洗嘢洗得多就會好似呢隻手指咁，爆咗囉。」
魏浚笙易濕疹爆發
皮膚乾燥是普遍大眾入秋之苦，就連向來保養得宜的高海寧都說：「我覺得天氣有啲乾，皮膚有啲乾，同埋容易啲敏感。」魏浚笙（Jeffrey）亦表示：「轉咗涼比較容易皮膚敏感，或者濕疹。」敏感症一般被認為容易在秋冬時節發生，鍾嘉欣亦不例外，她說：「天氣轉涼好容易氣管感敏，同埋好容易皮膚乾，眼如果年紀大咗都會乾。」
除了敏感及乾燥外，劉倩婷表示自己踏入秋冬會出現容易「瞓捩頸」情況。她說：「我幾次試過瞓捩頸，因為瞓捩頸好多時係因為感冒菌，或者吹親條頸就會瞓捩頸。」而陳曉華則表示會感到「沾寒沾凍」，直言「有種寒氣入侵嘅感覺」。鍾嘉欣則表示，入秋後皮膚變乾而且容易有氣管敏感情況。
相關閱讀：星級大搜查丨星級驚嚇事大揭秘！ 張家輝拍戲冇錢收驚見「張家輝2.0」 錢嘉樂遭六汽油彈炸傷需面部植皮
女星愛用油
入秋之苦人人都有，但明星們都各有對策。綜合多位藝人明星的回應，最多人為皮膚乾燥而煩惱。謝安琪一入秋便手指長倒刺，她說：「我嘅對策就係，呢啲乾燥你齋飲水，飲啲滋潤嘅嘢，例如雪梨、南北杏啊，其實唔係幫到最多，真係要重敷一啲好潤嘅潤手霜，係個手指呢啲最乾嗰啲位度，蓋住佢，直頭好似醃緊肉咁醃住佢。」而皮膚乾至濕疹大爆發的魏浚笙則指，會減少沖熱水涼，直言要「盡量不要令皮膚溫差太大」。
而鍾嘉欣則為保濕「無所不用其極」，她說：「我哋嘅身體要油份，所以我每朝早會飲一匙橄欖油，加返啲油份落身體度，我有時油到呢，成身油啊！我臨瞓前，我啲仔女會錫我，我老公又可能會錫我，佢哋就會話，嘩！好油啊媽咪！你個嘴又油，面又油。」
同樣用「油」解決皮膚乾燥問題的還有陳倩揚，她說：「我會建議大家用一啲沖涼油，可能先搽一搽個身，跟住好快過一過水就即刻出嚟印一印，印完之後，其實醫生成日都教，你要搽Cream，如果唔夠力，就搽啲好似豬油膏咁，即係厚厚地，令立立咁（嗰啲潤膚用品），搽一層好厚，如果你好乾嗰啲，敷住，第二朝起身即刻舒服咗好多。」
相關閱讀：星級大搜查丨明星齊「走膠」！宣萱因「熱氣球」震撼教育棄膠袋 林景程首選尼龍環保袋
雲浩影怕氣管敏感
除了皮膚乾燥，另一個最令明星們感困擾的入秋之苦就是氣管敏感，歌手雲浩影就是其中一位。雲浩影說：「我自己會食多啲喉糖，同埋會飲普洱茶，飲多啲暖水，飲啲雪梨茶，潤吓把聲，潤吓個肺。」而鍾嘉欣則靠營養補充品，她說：「其實你氣管感敏嘅時候，即係話你裡面好多炎症，如果你飲一啲維他命可以幫你抗炎症，咁佢就會好啲。」至於陳曉華則戴頸巾及口罩為氣管擋風。
你又有甚麼入秋煩惱和養生方案呢？快點留言告訴《星級大搜查》喇！
