10月13日，部份時間有陽光，有幾陣驟雨，局部地區有雷暴。上周港股全星期5個交易日均見下跌，恒生指數一周累計跌850點，報收26290。不過周五晚特朗普突然喺社交平台發文，因應中國收緊稀土出口限制，美方將於11月1日起，對中國進口商品加徵100%的新關稅（總稅率增至130%），同時對所有關鍵軟件（critical software）出口實施管制。佢批評中方加強管制稀土出口是對其他國家「極端敵意」（extremely hostile）嘅行動，更表示咁嘅情況下，似乎無必要跟習主席於月底APEC期間見面。呢個發文激起千重浪，上周五晚美股及港股夜期急挫，美股三大指數跌1.9%至3.5%不等，夜期當晚急插1314點至全晚低位24968收市。
特朗普又再TACO
不過特朗普周末期間再發文，表示未有取消與習主席於APEC期間會面，期後再表示佢無意傷害中國，更表示要觀察事態發展，再決定11月1日是否再對中國額外徵收100%關稅。換句話講，特朗普又再TACO（Trump always chicken out），黑期及美股期貨今早反彈，黑期跌幅較夜期收窄一半，今早重上25500水平，即預示今早大市仍會裂口低開逾700點，但已較夜期收市價跌幅收窄一半。
中國方面，商務部回應指出，中方關於稀土等嘅出口管制措施，係依法依規改善自身出口管制體系嘅正常行為，反斥美方長期借國家安全為藉口，濫用出口管制，敦促美方盡快糾正錯誤做法，以兩國元首通話重要共識為引領，通過對話妥善管控分歧。其實咁講即係唔會無彎轉，美國唔玩嘢，中國可以有傾計，但美國玩嘢，中國會奉陪到底。其實都係一貫技倆，中美雙方博奕持續。
經過4月一次，市場除咗已出現TACO交易之外，亦傾向相信中美雙方最終都係會以利益為前題，尤其特朗普只係口硬，中美仍會繼續貿易談判，最終仍可達成共識，只係當中過程十分漫長。
港股今日急跌反成進場機會
留意今早大幅裂口低開逾700點後，會否回補部份裂口，要視乎開市價能否企穩。25400水平相當接近5個月線，如守穩或反彈回補部份裂口，則留意25700至25800，即50日線會否由支持變為阻力，下一阻力為30日線約26200，至於20日線26600阻力更大。支持方面，25100-25200為首個支持，下一支持為24900-25000水平，即20周線及100周線附近，亦為夜期低位，若然失守此關，則整個長期升浪嚴重破壞。
筆者相信，港股仍處於牛市之中，加上特朗普TACO，今日急跌反而係進場機會，只要100日線及20周線即25000守穩，今日趁低吸納，以24900-25000作為防守，具有不俗值博率。
古天后
