踏入11月，恒指多次在26000點水平穿梭，低位跌唔落，高位升唔穿，以炒波幅為主。不過，中特估走勢明顯強於大市，石油、煤炭、內銀、內險、電訊等股份，不少已升穿高位，甚至創出歷史新高。點解會有呢個現象？大致可歸納三個原因。
第一，科網股累積升幅已多。港股今年累升三成，科網股肯定係領頭羊之一，但升市過後，估值已不如以往般便宜，資金不再不問價掃貨，令向上動力減弱，中特估估值相對便宜，資金換馬無可厚非。
第二，中美貿戰下的避風港。雖說中美貿易戰暫緩一年，但大家都怕特朗普反口，屆時外向型企業必定受當其衝，中特估業務主要在內地，受貿易戰影響較輕，成為資金追捧另一賣點。
第三，年尾已到轉打守勢波。今年乃投資豐收年，環球股市、黃金、Bitcoin無一不累積龐大升幅，距離2025年結束不足兩個月，大戶小戶鎖定利潤十分合理，如果仍想保持一定股票持倉，防守力高的中特估，可說是最佳選擇。
唐牛
fb︰https://www.fb.com/tongcow88
IG︰https://instagram.com/tongcow_88
YouTube︰https://www.youtube.com/channel/UCLwEpfQ6w1d-MUVlAS86QcQ
Threads︰https://www.threads.net/@tongcow_88
本欄逢周一、三刊出
