10月22日生日的Gordon Flanders在生日前夕推出他的第五首派台歌《不要評論這首歌》。他坦言新歌靈感來自他曾對於音樂及創作失去熱情的時候，Gordon認為，身為一個音樂人是需要無時無刻地喜歡音樂，可是他有時候也會因為音樂而感到氣餒或想逃離，這種矛盾嘅心態曾令他感到迷茫，質疑自己。
Gordon Flanders重燃創作熱情
Gordon說：「我最近啱啱推出咗新歌《不要評論這首歌》，點解會寫呢首歌呢？成個創作理念就係因為我最近做音樂嘅時候，發覺自己好似冇以前將音樂當做興趣時嘅熱情咁大，咁但係我好無奈地我又夾硬要強迫自己，因為我認為音樂呢一樣嘢係我依家嘅終身職業，咁我覺得我冇可能唔熱愛呢樣嘢，咁其實有一個好矛盾嘅心態就係本身呢一樣嘢係我嘅興趣，咁佢慢慢變成個職業之後，你可能會慢慢對於嗰樣嘢嘅熱情會減退，但係你又個內心又唔可以同自己講話其實我唔鐘鍾意依樣嘢，咁所以今次呢首歌就係就形容緊呢個好矛盾嘅心境。」 他繼續說：「我諗應該每一個創作者應該都會遇到一個煩惱啦，當一個興趣變成一個職業嘅時候，大家就會無意中畀自己一個壓力，咁其實呢首歌個創作嗰個理念就係希望我自己秉持住就係其實唔好諗咁多啦！」
Gordon分享選擇生日前夕推出這歌的想法，希望寄語自己能夠更加相信自己，堅定自己的目標！他說：「 今次呢首歌揀喺我生日前推出，希望自己用呢首歌去迎接一個全新嘅自己，即係27歲嘅Gordon Flanders，出完呢首歌之後最好就唔好對於自己嘅決定有咁多猶豫又或者多啲相信自己啦！呢個亦係我今年年尾亦都係來年畀自己一個目標！多啲相信自己！」
Gordon Flanders棄金髮
自加入華納後他一直以金髮、短褲、帶有陀錶造型現身，為配合新歌主題，Gordon把頭髮染深，以一身更為成熟的造型示人，他說：「因為我發現我近呢幾年我係金色頭髮，長年累月嘅漂髮令到我頭皮呀嗰啲髮質已經開始唔係好掂，咁所以為咗令到我自己（啲頭髮）可以行更遠嘅路，咁我就想休養一下我個頭髮先！咁呀今次或者接住往後可能一年兩年暫時大家都會見返呢個黑髮啦，咁希望大家會有新鮮感啦！」 Gordon更趁機「許願」，對向公司表示：「咁我亦都喺度許願啦！希望會有個Concert啦！如果真係有嘅話，大家記得係嚟睇啦！」
