許紹雄（Benz雄）今日凌晨因癌症引發身體機能衰竭離世，享年76歲，昨日（27日）被《星島頭條》獨家爆許紹雄病危入院，數十位圈中好友趕到醫院見許紹雄最後一面。《東張西望》今晚（28日）電話訪問許紹雄生前圈中好友譚玉瑛、麥長青，而馬國明、高海寧、羅子溢（前名羅仲謙）等在活動上，更含淚表達對許紹雄不捨之情。
譚玉瑛盼許紹雄家人心情平復
譚玉瑛接受電話訪問時，表示許紹雄予她的感覺是一位顧家的好男人：「Benz雄好愛佢嘅家庭，佢好聽老婆話，一切都係佢老婆想點，佢都會盡量fulfill（滿足）成個家嘅要求，佢係一個好盡責嘅典型中國男人。希望佢嘅家人可以慢慢平復心情。」
相關閱讀：許紹雄Benz雄離世 癌症引發身體機能衰竭終年76歲
而麥長青在電話訪問中表示，許紹雄是一位很好的前輩、同事、師兄及朋友：「因為佢真係一個好重情重義，好好嘅一個好朋友。總之依家所有關於佢嘅嘢，都充斥喺個腦裡面，好突然，同埋其實係幾難接受。」
馬國明、高海寧今日在《TVB同行新世代節目巡禮2026》上接受《東張西望》訪問，高海寧一度爆喊要轉身背向鏡頭。而馬國明先表示讀完訓練班後第一部劇集，許紹雄飾演其父親，被對方不斷鬧：「你想我而家鬧你，定係劇出街之後畀觀眾鬧你呢？呢句說話我依家都記住。」
羅子溢夫婦不捨許紹雄
高海寧提到許紹雄離世，雙眼通紅哽咽含淚表示：「我好好彩有演過佢幾次女，佢對我好好，因為我成日喺現場好容易緊張，佢會同我講使乜緊張啫，演戲最緊要開心，每次同佢對戲我都特別放鬆。我好感恩呢一世有機會遇到呢一個老竇。」
羅子溢透露與太太楊茜堯（前名楊怡）與許紹雄熟稔，在生活上有交集，許紹雄女兒結婚時，都有問楊茜堯有關裙褂的問題，羅子溢在內地開工時，許紹雄亦曾送上藥膏給他，甚至在外地都會相約飲茶。羅子溢昨日收到消息後向太太轉述，當時正在開工的楊茜堯：「佢都好傷心。」
汪明荃舊訪問片重溫
《東張西望》又播出汪明荃在1990年節目《K-100》訪問許紹雄的影片，提到「Benz雄」稱謂，因喜歡駕駛一種名牌車，不惜在月入只有數千元下，仍花逾千元供車。許紹雄解釋：「其實嗰隻叫『孤寒車』，如果你揸啲平啲車呢，開始係平，但係你十年要換幾架，等於仲衰過揸嗰啲名車。」
相關閱讀：許紹雄離世丨入行逾半世紀經典角色回顧 樂做綠葉教寫「方中SIR」成代表作
