近日江美儀前往荃灣一間佛堂，拜見來自泰國的金龍王，獲贈言「越來越好」。對於57歲前夫吳君祥在9月被《東周刊》踢爆成功覓得第二春，新歡更獲家人認可，美儀首回應兼大方送上祝福，「有咪好囉，咪恭喜佢囉。」失婚9年的她感情仍未有着落，直言隨緣不強求，卻拒絕再玩交友App。 文：方騫平 圖：娛樂組
在佛堂內，江美儀虔誠參拜後獲金龍王贈言，她笑言：「金龍王話我會『越來越好囉』，咁明天一定會更好㗎啦。」她透露並無特別許願：「我冇乜特別許願，都係開心及身體健康，話題提及住屋問題，反而冇問到感情問題，感情隨緣啦。」
索同追係兩回事
對於前夫吳君祥被《東周刊》獨家直擊吳君祥帶第二春與母親冬嬸及圈中友人飯聚，新歡更獲未來奶奶歡心，看來好事近。江美儀坦言有留意新聞，大方回應：「有朋友傳報道畀我睇，我唔知佢係咪合適時候再婚，總之有咪好囉，咪恭喜佢囉。」她直言未見過吳君祥女友，故不知她是誰。她強調離婚後與前夫關係良好，保持聯絡，但不會談論感情事，見面亦不尷尬：「同一大班共同朋友食飯見面，就算前夫有同場，但唔會有機會講私事，佢亦唔會帶埋新歡現身嘅。」
開拓事業新賽道
54歲的江美儀感情未有著落，直言隨緣不強求。被問到保持魅力是否有追求者時？她即耍手直述：「冇喎，索同追係兩回事。」她透露曾嘗試網上交友，但了解運作模式後便失去興趣：「我已知道成件事嘅構造，所以冇興趣再玩，都係實際啲算喇。」她強調感情事靠緣分：「有又好冇又都好，冇乜所謂最緊要講緣份。」目前她寄情工作，返內地做直播帶貨：「老實講唔係搵到好大錢，但都好過坐喺屋企冇嘢做，每個人都要養家會擔心冇收入，算係一條新賽道，試下呢個方向得唔得，都好呀可以識到唔同嘅人及產品，更加可以增添粉絲，我幾enjoy。」對於最近TVB重播十年前的經典劇集《親親我好媽》，她感慨萬千：「時光飛逝咁快就十年，劇中班𡃁妹都長大晒，我哋成日都有食飯。」
