由蔣怡（Coco）主持聯同兩大星級名廚張錦祥（Ricky )及余健志（Jacky）任主評判的HOY TV 全新飲食競技節目《領廚爭霸戰》已經完滿結束，最後由Owen憑著精湛廚藝獲得冠軍，梁兆楹（Shirley）獲選亞軍及「最強人氣廚神」獎，想不到因為一個訪問，觸發了一輪罵戰，梁兆楹開IG Live時一度激罕爆喊！
樂翊榆稱以為梁兆楹係內定冠軍
事緣有「美女玄學家」之稱的樂翊榆（Annalise）今次為節目擔任嘉賓，賽後樂翊榆受訪時表示：「我本身係諗住Shirley，因為Shirley同大家熟，會唔會內定呢？點不知原來HOY TV 係咁公平喎。」結果被辣㷫的梁兆楹轉發樂翊榆IG限時動態的留言：「自己講完都覺得好笑。」後說：「其實你咁有意見，不如返去叫你個台開個票數出嚟睇下。」
相關閱讀：伍富橋「億萬老婆」梁兆楹出戰《領廚爭霸戰》 因一事廚藝大爆發享受為家人下廚：好滿足嘅事
梁兆楹寸爆樂翊榆「你今次真係惹錯人」
梁兆楹昨晚（30日）曾在IG為此事開Live，她直言對方的言論對自己傷害甚大：「如果我想課金，我都唔會課一個豬肉獎畀自己，或者我會買個冠軍畀自己。我覺得你好平常嘅一句嘢，可能你覺得好好笑，但係對我嚟講係一個好大嘅侮辱。因為喺呢5個月，我真係自己去練習、研究食譜去做每一樣嘢，到臨陣上去比賽，係冇人代我煮，可能你哋覺得係剪接，但係呢個獎如果係覺得有異議，我可以唔要啲獎金，甚至攞返個獎出嚟，因為個獎對我嚟講，我唔會喺呢方面發展，唔會係我個職業。」一度爆喊的梁兆楹待心情平伏後再說：「我又唔可以冇所謂，因為冇所謂係侮辱咗其他參賽者。我想講個比賽真係公開公平公正，如果有咩不滿，你可以直接DM我同我講，而唔係喺背後做咁多小動作。我覺得自己有付出，所以我有必要去維護返我自己，同其他人嘅努力。」梁兆楹又稱喊本身並不是她的性格：「呢個live真係失禮咗少少，但我真係忍唔到，做人都係唔可以太友善，可能要mean返少少，打狗要睇主人，你今次真係惹錯人，我諗你真係好清楚你自己係邊個。」
樂翊榆稱笑自己嘅遭遇係唔公平
其後梁兆楹再貼出張截圖，內有樂翊榆的留言：「我指嘅好笑係寫稿馬先生以前係我做嘅節目係我搵嘅item cut 走我。有記者會唔通知我出席。佢哋對我唔公平。我只係參與明星賽同埋部分買餸嘅拍攝，我唔知成個比賽嘅內情係點。我只係答記者個比賽公平，但係我笑自己嘅遭遇係唔公平。另外，如果你嘅資訊係來自一個記者，我坦誠咁講，該記者自以前已經捉我訪問嘅字眼嚟做文章，製造分化。我喺呢個電視台一向都其他藝人都唔熟悉，亦唔知道大家背景故事，但係該記者唔只一次用我嘅片言隻語挑釁其他藝人，意圖要所有人同我對立。我相信對你講真話係化解誤會嘅唯一方法，我亦都相信你係能夠分辨是非。」梁兆楹亦有留言反擊：「樂小姐你好，其實你要解釋嘅唔係我，而係你所謂一句俾人所謂嘅挑撥，係會抹煞咗成個比賽嘅台前幕後、參賽者嘅努力，亦會令到所有評判、主持人嘅公信力被質疑，所以我先會畀反應你。至於你同馬先生嘅過節並唔係我嘅問題，如果你可以先注意一下自己嘅言行舉止，人哋係唔會有機會挑撥離間，製造分化，你嘅人緣關係問題，亦唔需要同我分享。我自問係一個可以明辨是非嘅人，亦聽得明人話，己所不欲勿施於人，如果你曾經有個同樣嘅遭遇，就更應該知道唔應該將自己一時嘅諗法去隨便評論別人，希望你可以學識『道歉』兩個字點樣寫，而唔係繼續推卸責任。」
相關閱讀：「億萬駙馬」伍富橋新歌MV富貴太太「被演出」有原因 自家製作成本超乎想像
