對食物過敏人士來說，外出用餐常需格外小心，嚴重的話甚至會威脅生命安全。最近，一名患有花生敏感的食客於連鎖壽司店用餐，誤食未有標示含有花生成分的「焦糖慕絲蛋糕」，險引發嚴重過敏反應。事主隨即向分店職員反映，惟期間被職員1句話惹怒，事件迅速引發熱議，網民斥：「食物過敏可大可小，隨時要入院！」
食客患食物敏感誤食含花生成份蛋糕 遭連鎖壽司店職員「冷處理」1句惹怒
最近，一名患有花生敏感的網民於Threads發文控訴連鎖壽司店，指日前在店內用餐時點了一份「焦糖慕絲蛋糕」作為甜品，因餐牌未標示該款食物含有花生，導致事主誤食，她指「當刻以為係自己睇漏眼，即刻同朋友睇返餐牌同埋Instagram宣傳post（帖文）」但兩者均未提及該蛋糕花生成分。
事主隨即聯繫店員反映問題及要求退款，不料對方回應冷淡，僅稱：「不如朋友食咗佢，反正朋友冇敏感」雖店方事後承認蛋糕餅底含有花生成份，但由於事主已食用部分蛋糕，以退款「好難做」為由拒絕。
事主無奈表示，「我心諗我食咗落肚你仲難做，我瞓住喺你舖頭俾人抬出去，你應該仲大鑊。」她補充，回家後因誤食花生碎出現嘔吐及胃痛症狀兩小時，需服用過敏藥緩解：「如果我食得過量多，真係要入醫院。」
她強調，若餐牌明確標示花生成分，她絕不會點選該甜品：「自問平時出街食飯都好小心，無論食咩菜都會問有冇花生或者花生醬喺入邊，之前一路都相安無事。」並批評餐廳員工態度惡劣，建議加強培訓：「花生都算係較普遍嘅致敏源，係咪應該考慮寫返入餐牌？麻煩做返好啲員工培訓」、「今次咁勞氣係因為你哋個管理層處理得好有問題……係由頭到尾態度都好差，連道歉都冇。」
網民斥：可大可小隨時入院！
事主遭遇迅速引發熱議，不少網民認為食物過敏問題「可大可小」，嚴重時可能危及生命。有網民指出，「飲食相關嘅公司，稍為有規模少少都會標示含有咩致敏源」、「餐廳理應要標示常見致敏原，而喺外國餐廳Order（下單）時，好多時Waiter（侍應）都會問返人有無對咩食物敏感」、「間餐廳都處理得幾差」、「好彩樓主係身體有大反應前察覺到咋，呢啲真係可大可小。」
但有人則認為事主應負一定責任：「如果你有食物敏感，你應該優先問左（咗）員工個樣野（嘢）既（嘅）食物成份先，如果你無問就私底下叫，就同閣下自理風險無分別」、「但係你有敏感，其實都有責任主動同職員講，如果職員話無，但最後原來有花生，咁係完全係店舖責任。」不過隨即遭到網民反駁：「花生致敏同海鮮致敏一樣係可以死人程度，唔係痕下出下疹食藥就冇事。」、「咁大間飲食集團，一啲警覺性都冇，仲要經理嘅知識對都咁貧乏，啲留言仲話咁樣叫西客？花生敏感可以死人㗎！」、「其實嚴重食物敏感真係會死人，點解咁多香港人忽視呢樣嘢？依家有啲包裝食物都會標明間廠會唔會同時製作堅果類食物」、「無人會無啦啦覺得焦糖蛋糕會有花生成分。」
記者就事件向該連鎖壽司店查詢，惟在截稿前未獲回覆。
來源：Threads
