有港女發現，鄰居搬走幾年後，依然以舊地址嗌外賣，無人接收的外賣孤零零放在蒙上厚塵的鐵閘前。由於情況接二連三出現，在細思極恐下越想越心驚驚。有細心的網民更加發現，外賣單據上留下的5字「詭異」備註……詳情見下圖及下文：
鄰居搬走幾年照嗌外賣 網民關注「詭異」5字備註逐張睇↓↓↓↓
樓主：搬走幾年都未改地址
樓主昨日（4日）在社交平台Threads上載相片發帖，指「搬走咗嗰個鄰居又嗌外賣喇，噚日晏晝嗌到今朝仲喺佢門口，搬走幾年都未改地址？起碼都第3次，都唔改返？一個飯$94咁就嘥咗，仲嘥晒啲食物」。
事件中的外賣連運費共94元。細看單據，有備註提醒外賣員「放在掛在門時 不用按門鈴」。有回應的網民也留意到這點，留言「仲要特登寫住請放在門外，不用按門鐘」。樓主回應指「上次都有寫」，網民於是建議「不如試下記錄低幾時會有新外賣」。
相關閱讀：70歲婆婆將軍澳做外賣步兵 買餸車送餐「做一事」超細心 網民大讚：肯定乾淨！
樓主自爆細思極恐心路歷程
今年6月底，樓主曾就同類問題發帖，當時描述得更詳細，並自爆細思極恐的心路歷程——
「有啲驚，已經唔係第一次，同層有家搬走咗好耐，無人住無人出入，上次又係咁，有個外賣放咗喺門口兩日，嗰次當佢送錯咗通知管理處搵人處理咗佢」。
樓主續稱「噚日收工返到嚟又有一個外賣喺地下，佢晏晝訂餐，我返到嚟都天黑，我試下撳鐘，連鐘聲都無，鐵閘鋪滿塵，應該無人搬入嚟。點解又會再次有外賣？又送錯？定係又寫錯呢個地址？諗起啲好耐以前嘅鬼故，細思極恐，講句唔好意思，即刻跑返屋企」。
網民也聽得有點毛骨悚然，當時有人留言「呢單嘢實在堅，恐怖熱線」。不少人乘機講鬼故，有人笑言「我都諗起嗰個外賣鬼故，經過聽下有無麻雀聲啦」。
相關閱讀：送外賣倒瀉晒不顧而去 苦主開門驚見「奶茶湖」 網民鬧爆外賣員 分享送餐心得
有想法正向的網民則極力安慰樓主：
•個舊地址無刪！唔小心？
•我覺得係佢成日唔記得改地址；
•有無諗過係呢戶人搬咗，但無更改送貨地址？
•我覺得最大機會係～㩒錯地址。好似我為例～有陣時放假，都唔小心用咗公司地址落單；
•好多嘢都有得解釋嘅……可能嗌嗰個人自己撳錯地址？發生呢啲事情好普通啫，如果嗰袋係元寶蠟燭香你先至驚啦！
不過，樓主似乎未能釋懷，在回應網民「個鐵閘真係好厚麈，應該好耐無人住」的留言時重申「搬走咗好幾年」。
有網民和應，指「呢下先得人驚喎，咁耐都仲會係上一家人無轉地址送咩」、「我成日心急禁錯地址，不過錯幾次都唔delete（刪除）舊地址又奇怪啲嘅」，樓主也留言附和「我都係咁諗呀，幾年都唔轉？仲要唔係第一次叫咗無得食喎」。
相關閱讀：外賣炒飯提100字「食神級要求」 店家結果咁處理 網民：嚟到都唔敢食
還有網民抱另類想法：
•有無睇下個地址，會唔會係外賣小哥失魂送錯？
•有無可能係男仔送早餐俾女仔，但唔知道人哋搬咗；
•會唔會係有人唔知你鄰居搬咗屋，照叫咗外賣過嚟俾佢啊；
•會唔會係收數佬幫債仔叫外賣？有人收餐咪上門收數；
•有聽講過係收數佬嗌過去睇下有無人，類似係咁我唔係好記得了。
資料來源：asurashuraba＠Threads
相關閱讀：南亞外賣員長沙灣瘋狂掟餐 禮貌取餐後突發爛渣：「你同我玩嘢啊！」原因耐人尋味↓↓↓↓
今年初，網絡瘋傳有南亞裔外賣員在長沙灣一間海南雞店，禮貌取餐後突發爛渣，在店外瘋狂掟餐，撒滿一地，原因耐人尋味。現場的CCTV片在網上瘋傳，全過程如下↓↓↓↓
