葉蒨文（Sophie）與曾展望（GM）因《女神配對計劃》而爆紅，兩人在節目完結後多次公開拍拖，更以情侶檔身份出席商業活動。早前葉蒨文接受傳媒訪問時，曾分享個人成長背景，提到自己在單親家庭中長大。但近日有網民在社交平台發公開帖文，質疑葉蒨文說話「前言不對後語」，直言「都唔知幾時真幾時假」。
網民留言質疑葉蒨文：唔知幾時真幾時假
一名網民在7周前於葉蒨文的Threads帖文上留言說：「佢話佢單親，但之前另一個訪問有講過自己同男朋友分手父母唔鍾意，都唔知幾時真幾時假。」其後葉蒨文以個人Threads帳號留言回應說：「後父都係父，唔使質疑我講嘢啦，搵唔到漏洞㗎，因為我講嘅都係真話。」一星期後，該名網民又回覆葉蒨文說：「咁觀眾點會無啦啦知你有後父？不知者不罪覺得奇怪唔使話人搵你漏洞呀？」
葉蒨文：我已經非常客氣咁回應
相隔數星期後，葉蒨文又回覆該名網民的留言說：「你如果喺你自己IG講我唔理你，你入嚟我嘅專頁並在我的專訪下提出：唔知幾時真幾時假，提出對一個人人格真誠嘅質疑，我已經非常客氣咁回應，希望唔好影響呢個專訪嘅質感。我明白而家網絡有啲人嘅心態都係鍾意講乜就講乜，多少有點不負責任，但我都係堅持對人應該有返適當的尊重同禮貌。」其後該名網民又在同一星期內再次回覆葉蒨文的留言說：「即係咁，人紅咗都唔好咁自大，我留言係俾ESQUIREHK嘅，仲有我唔覺得你嘅回覆有幾禮貌，做明星做到你咁冇氣量真係睇你靠戀情紅得幾耐。」
葉蒨文遭網民公審回應無禮
其後葉蒨文在兩星期後又回覆該帖文說：「首先，this is a collab post Obviously, and it’s on MY page too. 第二，自大同理直氣壯係兩樣嘢，我由以前到而家處事都一樣不卑不亢，就算參加戀愛綜藝之前我見到有啲過分嘅網民我都會照樣分享我嘅睇法 wish you all the best!」
這段在葉蒨文專頁內的對話雖然到此結束，但該名網民較早前就將這段與葉蒨文的對話公開「貼堂」，並留言批評葉蒨文說：「古有好勝gigi 今有好勝sophie，事緣係有一排報導賣得好勁話佢係單親成長，咁作為一個路人，真係冇特別去考究點解佢單親同埋佢阿媽有冇再嫁俾第二個男人，結果有一日又有報導sell佢嘅感情屎，話同拍咗拖六年嘅男朋友分手父母都好反對，於是就有我第一個留言，然後不卑不亢嘅sophie不甘心被我”搵到漏洞”所以親自回覆，其實當時我已經解釋咗唔會無啦啦知佢有後父，一直以為就咁完咗，點知本尊喺一個月後又覆咗我，當時已經覺得好搞笑 既然佢咁想同我互動 我又覆返佢啦，如是者又以為佢已經唔會再理，點知今日半夜三更又起身摷返嚟回應我，與其所有留言都要覆都要拗贏 浪費時間同啲鍵盤網民(me)明辨是非，不如用啲時間鑽研下啲演技？？成件事勁無聊 純粹想分享下佢啲文字版嘅綠茶Xtone。」
網民狂鬧樓主：你呢種人真係性格差
不過該名網民發帖後，似乎沒有得到網民支持，反而被多位網民留言狂鬧，有人留言說：「公眾人物解釋兩句都叫好勝，會唔會係你呢種錯左唔認先叫好勝 自己冇道理就企圖標籤”綠茶”or”人紅左”去模糊焦點，你呢種人真係性格差，夠難頂。」、「樓主 del post啦 真係你有問題 又要挑機 又要輸唔起 小學生咩」、「你都幾無聊， 你質疑人地講大話就得， 人地同你解釋抗辯就唔得， 做藝人每個就都一定要卑微比你譴責唔可以反坑？ 就係因為有你尼（呢）d心態的網民， 先有網絡欺凌。」
