香港不少商場都會設置應節的節慶裝飾，讓市民打卡拍照。最近，有將軍澳街坊發現附近一個商場的大型中秋裝飾，在中秋節過後一個月仍未拆除，質疑商場「慳皮」，並稱「打算諗住擺到聖誕節？」惟網民憑照片中1個細節，推測商場「重用中秋裝飾」的用意，並反問「有咩問題？」
將軍澳商場「慳皮」重用中秋裝飾？街坊：諗住擺到聖誕節？
有網民於Facebook群組「西貢將軍澳討論區」發文，指將軍澳一個商場內的大型發光月亮裝置，在中秋過後一個月仍未拆除，質疑因成本問題「重用中秋裝飾」，稱「過完中秋仲未，打算諗住擺到聖誕節？」並於留言區續指該商場此舉相當「慳皮」。
眼利網民憑1細節反指「有咩問題？」
帖文引起網民關注，有眼利網民隨即指出該月亮裝置印有南瓜、蜘蛛等萬聖節元素，推測應是萬聖節裝飾，直言「呢個係萬聖節佈置嚟」、「啲裝飾都有Halloween款式，應該放到月尾啦！」、「點睇個南瓜同蜘蛛都唔似中秋節啦。」有網民則欣賞商場的創意，只要利用不同元素，同樣裝飾即可一次過慶祝兩個節日，「一物兩用」既節省成本又環保：「當恆常裝飾都好，掉晒去或搵倉收埋先浪費」、「幾好呀，常擺裝飾都唔差，好過放入堆填區」、「擺幾日就掉仲浪費金錢」、「到時加啲紅、白、綠嘅飾物就有聖誕氣氛」、「環保版萬聖節裝飾」、「中秋用完改一改變成萬聖節用唔好咩？」
翻查官方專頁資料，商場分別於中秋及萬聖節前夕發文為裝置宣傳，從圖片可見該月亮裝置在中秋過後亦有加上萬聖節元素，並特意加入南瓜圖案燈光投影增添氣氛。
來源：Facebook群組「西貢將軍澳討論區」
延伸閱讀：萬聖節好去處2025｜20大鬼屋/活動推介！海洋公園哈囉喂/迪士尼惡人派對/大帽山鬼屋/伊藤潤二鬼屋展覽
